Новиот воспитно-поправен дом во тетовското село Волковија е речиси празен, а малолетнички спрема кои се применуваат воспитни мерки се сместени во женското одделение во затворот „Идризово”, иако не смеат да се таму, затоа што се загрозени од возрасните, предупреди народниот правобранител Насер Зибери кој денеска го презентираше годишниот извештај за работата на Омбудсманот.
Тој најави дека ќе бара од надлежните во затворот „Идризово“ да се преместат девојчињата во тетовскиот поправен дом во кој се сместени 22 деца и момчиња. Зибери забележа и дека од почетокот на годинава не бил одржан ниту еден училишен час во домот. Народниот правобранител вели дека за ова е одговорно Министерството за образование кое од една страна го прекршува законот за основно и за средно образование,а од друга не им овозможува ресоцијализација на младите сместени во домот.
-Малолетничките кои се во женскиот дел на затворот Идризово не се во иста просторија со возрасните осуденички, но тие сепак се во непосредна близина до жените осуденички и се загрозени од нив, рече Зибери и реагираше што овие малолетнички немаат пристап до лекар кој како што објасни интервенирал само во затворениот дел на затворското одделение.
Зибери денеска информираше дека најголем број претставки се однесуваат на правосудство, а дека една третина од вкупниот број претставки се за постапките со извршителите и превисоките камати.
Тој реагираше дека камататите се голем товар за граѓаните и дека е недозволиво да бидат и до три пати повисока од основниот долг, па затоа најави дека ќе поведе постапка да се усогласи каматата најмногу до 100 отсто од главниот долг.
Според Зибери не смее во една држава како нашата која се декларира како социјална да има граѓани кои цел живот се должници кон доверителите, поради ниските примања и превисоките камати.
С.М.
