Заменик претседателот на Владата за европски прашања, Бојан Маричиќ имаше средба со амбасадорката на Кралството Шведска во земјава, Кристин Форсгрен Бенгтсон.
На средбата се разговарало за приоритетите во работењето на Секретаријатот за европски прашања во наредниот период, резултатите од тековните реформи, како и за можностите за продлабочување на билатералната соработка.
Вицепремиерот Маричиќ ги претставил приоритетните активности и изразил уверување дека со лична посветеност и силна заложба ќе работи на унапредување и зајакнување на улогата на Секретаријатот за европски прашања како координативно тело на евроинтегративниот процес на Северна Македонија.
Фокусот бил ставен на билатералната развојна соработка помеѓу двете земји, која традиционално се остварува во рамки на Договорот за развојна соработка помеѓу Република Северна Македонија и Кралството Шведска. Од страна на амбасадорката Форсгрен Бенгтсон била презентирана новата Стратегија за развојна помош 2021-2027, во која е предвидена и нашата земја за користење на финансиски средства во приоритетните области, клучни за реализација и унапредување на реформскиот процес. Амбасадорката додала дека Кралството Шведска, како најголем билатерален донатор од земјите на ЕУ во земјата, ќе продолжи со поддршката на Северна Македонија и во претстојниот период.
Новата Стратегија за развојна помош предвидува четири приоритетни области за поддршка на процесот на пристапување за унапредување на економската интеграција со ЕУ и развој на пазарната економија, зајакнување на демократијата, почитувањето на човековите права и владеење на правото, заштитата на животната средина и подобар одговор на климатските промени како и градење на инклузивни општества.
Вицепремиерот Маричиќ во разговорот изразил благодарност за континуираната и принципиелна поддршка на Шведска за евроинтеграцијата на Северна Македонија и ја истакнал важноста од понатамошен развој во реформската соработката меѓу двете земји, но и во соочувањето со бројните глобални предизвици, како земја кандидат за членство во ЕУ.