– Не е коректно да ја коментирам постапката за избор на виши обвинители но ќе има и други огласи кадешто ќе може повторно да се конкурира, вели министерот за правда Бојан Маричиќ околу одлуката за Ленче Ристоска да не биде избрана за виш обвинител.
Тој во изјава за ТВ21 вели дека проценката е исклучиво на Советот на јавни обвинители.
– Мислам дека не е спорно дека таа е квалитетен обвинител, тоа го покажала на дело. Всушност, владата во договор со обвинителството ја предложи за претстваник во Евроџаст, тоа е европската мрежа за судско обвинителстка соработка во Хаг, каде што таа ја претставува државата. Мислам дека со самото тоа веќе сме го кажале мислењето“, додава Маричиќ.
Министерот смета дека Советот на обвинители имаат начин и критериуми по кој што ценат кои обвинители треба да бидат избрани, а Владата во тој дел нема право и не треба да коментира.
– Треба да се има предвид дека ова е само еден круг на избор, јас сум сигурен дека во иднина ќе има и други избори на јавни обвинители на различни нивоа, така што секој добар и квалитетен обвинител кој што има што да покаже може да се надева и да конкурира да биде избран и во иднина. Така што ова не е ни прв ни последен конкурс или оглас на кој што се бираат обвинители“, вели Маричиќ.