Стотици илјади луѓе во целиот свет излегоа на улиците на големите градови, за да ја изразат својата загриженост од климатските промени и да побараат од политичарите повеќе активни дејства против глобалното затоплување, соопштија светските агенции.
Меѓународниот ден за акција беше организиран во пресрет на самитот за климатските промени на ОН во Њујорк, на кој ќе учествуваат над 120 држави.
Маршот беше најмасовен во Њујорк, градот – домаќин на форумот.
Според организаторите на акцијата во неа се вклучиле околу 310 000 луѓе, меѓу кои и генералниот секретар на Обединетите Нации Бан Ки-мун, поранешниот потпретседател на САД Ал Гор, актерот Леонардо ди Каприо и други. Слични настани се одржаа во 166 земји, вклучително и во Бугарија, Велика Британија, Франција и Авганистан, соопшти Ројтерс.
Генералниот секретар на ОН, облечен во маица со натпис „Сакам акција за климатските промени”, одеше заедно со француската министерка за екологија Сеголен Ројал. –
-Ова е планетата на која ќе живеат наредните генерации.Нема резервен план, бидејќи немаме резервна планета изјавил Бан Ки-мун пред новинарите.
Актерот Леонардо Ди Каприо на маршот се придружил со групата на претставници од Еквадор, кои долги години водат правна битка со компанијата Шеврон поради загадувањето во џунглата на Амазон.
Пред неколку дена Националната управа за океанографски и атмосферски истражувања на САД соопшти дека август 2014 година бил најтоплиот месец на планетата од 1880 година, кога и започна собирањето на податоците за температурните вредности.
Годинава во август просечната температура на површината на океаните и на копно била 36,35 степени Целзиусови, односно со 0,75 степени Целзиусови над просекот за 20 век и со 0,04 степени Целзиусови над претходниот рекорд регистриран во август 1998 година.
