Во организација на здружението на граѓани „За нас се работи“, а под мотото „Марш за живот – Битола сака да живее, Битола мора да живее“, денеска граѓаните на Битола излегоа на вториот протестен марш против алармантното загадување на воздухот во градот под Пелистер.
Како што рече Горан Пинза, член на здружението „За нас се работи“, на граѓаните на Битола им е доста од пилот-програми, физибилити студии и ветувања дека некогаш нешто ќе се направи.
– Граѓаните сакаат да знаат кога и што конкретно ќе направат надлежните за решавање на проблемот. Ако ние како граѓанска организација која постои 2 и пол месеци успеавме да донесеме мобилна мерна станица, тогаш се прашуваме како може општина која го има еден од најголемите буџети во Република Македонија да не може, односно да не сака да започне со решавање на проблемот, рече еден од организаторите на протестниот марш, Горан Пинза.
Денешниот марш граѓаните го започнаа од пред споменикот на Стив Наумов, од каде преку „Широк Сокак“ се упатија пред зградата на локалната самоуправа.
Од пред зградата на Општина Битола на големиот број граѓани кои денес по втор пат го кренаа гласот против континуираното загадување на воздухот, им се обрати членот на здружението „За нас се работи“, Иван Јерчиќ.
Според Јерчиќ, граѓаните на Битола уште еднаш докажаа дека можат да бидат солидарни во една идеја и одговорни кон идните генерации. Тој исто така потенцираше дека во изминатите неполни 3 месеци, здружението „За нас се работи“ заедно со граѓаните иницирале многу прашања и дошле до многу нови сознанија.
– Направивме да се зборува за проблемот, направивме да се отвори прашањето за аерозагадувањето. Сите донесени решенија, сите затскриени заклучоци, сите во фиока сокриени акциони планови да го видат светлото на денот. Сите ние сега знаеме што е, а што не е направено по однос на аерозагадувањето во Битола. Успеавме да направиме една граѓанска иницијатива да влезе на расправа во Советот на Општина Битола и по неа да се донесат заклучоци, рече Јерчиќ.
Претставници на здружението „За нас се работи“ беа примени од страна на битолскиот градоначалник Владимир Талески, на кого му ги доставија нивните барања: поправка на постојната или поставување нова мерна станица во центарот на Битола, изработка на регистар на аерозагадувачи врз основа на резултатите од хемиската анализа на ПМ 10 честичките и постапување по истите, како и доведување во квалитетот на воздухот во рамките на нормалата.
Од денес во Битола започна со работа мобилната мерна станица која ја обезбеди здружението „За нас се работи“ и која во следните 14 денови ќе ја мери загаденоста на воздухот во централното градско подрачје.
Измерените податоци ќе бидат однесени на анализа во овластена лабораторија во Србија, а добиените резултати здружението ќе ги достави до локалната самоуправа, која после тоа ќе има задача да преземе конкретни мерки.