сторијата е превземена од сервисот на македонски јазик на Дојче Вече
Полициските службеници само го исмеале кога ги молел да ја побараат неговата ќерка, затоа што забележале дека припаѓа на пониска каста, сведочи таткото на една од жртвите. Групното силување на две тинејџерки во индиската сојузна држава Утар Прадеш повторно во фокусот го доведува односот на полицијата и судството во Индија.
Покрај двајца осомничени за делото, уапсени се и двајца полицајци, додека неколку службеници засега се суспендирани од должност. Обвинувањето гласи-сомневање за одложување на постапување, но и можна соработка со извршителите. Семејствата на жртвите припаѓаат на заедницата Далит, најниската каста во Индија.Двете девојчиња-братучетки на возраст од 14 и 16 години, биле пријавени за исчезнати од нивните семејства уште во вторникот вечерта, а нивните тела, обесени на дрво, биле откриени во средата.
„Таткото на едното девојче вели дека тие биле силувани од петмина мажи и потоа обесени од извршителите“, соопшти портпарол на локалната власт.
Истрагата на убиството го потврди силувањето. Но, според истрагата, можно е девојчињата самите да се обесиле поради очај и срам. По пронаоѓањето на обесените тела, во селото не престануваат протестите против полицијата. Стотици жители на селото го блокираа патот, барајќи консеквенци за одговорните службеници.
Регионалниот шеф на полицијата Атул Саксена ги отфрли обвинувањата за дискриминирачко постапување. Односите во врска со кастите не играат никаква улога врз постапувањето на полицијата, сите се исти пред законот, тврди тој.
Во декември 2012. година случај на групно силување на млада студентка со смртни последици во Њу Делхи предизвика огорчување во светски размери, а во Индија масовни протести против секојдневното насилство против жените во индиското општество. Оттогаш казните за силување се заострени, а повторно се разгореа дебатите за положбата на жената во Индија.