Се откажуваат туристичките аранжмани поради случувањата во Куманово и кризата во Македонија. Само овој месец веќе се откажани голем број на патувања во нашата држава без разлика дали се минимални, индвидуални или групни.
Доколку продолжи овој тренд, јас сум сигурен дека оваа сезона ќе пропадне, вели во емисијата ПРОЦЕС Ангел Иванов од туристичката агенција„Адријатик Маврово“. Се откажуваат аранжманите во туристичките места, но и во хотелите во Скопје.
„Една резервација за 21 мај на една група од Хонк Конг веќе е откажана, а има серија други најави за откажување. Наместо да работиме на резервации и доаѓање на нови туристи, сега работиме на сторнирање на резервациите, што за нас е болно, шокантно и проблематично финансиски. Ова оди на штета на угледот на државата и на туризмот“, вели во ПРОЦЕС Иванов.
Тој објаснува дека сервисираат услуги од Далечниот Исток, Јапонија, Хонг Конг, Тајван, Тајланд, резервациите се направени уште минатата година, а сега туристите се принудени да ја променат дестинацијата во последен момент, буквално во пет до дванаесет.
Дека кризата се одразува негативно врз туризмот потврди денеска Агенцијата за промоција и поддршка на туризмот, која одржа вонреден состанок.
„Првиот апел е да се информира за реалната ситуација, да немаме сопствени интерпретации и да не се предимензионира ситуацијата со оглед на тоа што се донесува под ризик не само една туристичка сезона, туку и повеќе туристички сезони“, вели директорот на Агенцијата за промоција и поддршка на туризмот, Александар Џамбазовски.
Тој најави дека планираат да направат кампања во соседните држави каде ќе уверуваат дека Македонија е безбедна земја, која дополнително ќе биде осмислена. Во меѓувреме, МНР презема мерки за презентирање на состојбата во земјата, преку дипломатските претставништва“, рече Џамбазовски.
Каква е ситуацијата во туризмот, постојат ли механизми како да се заштитат граѓаните од измами, какви механизми има државата, повеќе на оваа тема ќе гледате во емисијата наредната емисија на ПРОЦЕС.