Посетата на помошник државниот секретар за европски и евроазиски прашања на САД, Џејмс О’Брајaн на конференцијата за Планот за раст на ЕУ за Западен Балкан во Скопје, според поранешниот дипломат и актуелен универзитетски професор – Нано Ружин, имаше за цел да се добие појасна слика за тоа како политичките партии во Северна Македонија – и во Албанскиот и во Македонскиот блок се подготвуваат за парламентарните избори.
– Видовме дека во една јасна порака, тој им се обрати и на граѓаните и на политичките партии, истакнувајќи дека од една страна, мислејќи на партиите кои се во коалиција на власт, дека имаме политички партии кои што се јасни – кои што се евроатлански oриентирани, кои што настојуваат државата да ја внесат во ЕУ. Да не заборавиме во овој момент Европската унија е големиот партнер на САД по повеќе прашања, вклучувајќи и битката која што ја води во Украина, значи како сојузници и затоа се настојува овие политички партии и натаму да ја одржат таа насока на опстојување. Од друга страна анализирајќи ги опозиционите партии пред сè ВМРО-ДПМНЕ, О’Брајaн истакна дека имаме работа со една политичка партија која што нема јасни визии за тоа што сака, дека ветува само промени, меѓутоа, какви никој не ги знаеме, изјави Ружин за „Фронтлајн“.
Мислам, додава професорот Ружин, дека тоа се должи на стратешка грешка на ВМРО ДПМНЕ во којашто влезе самата со перманентното негирање на прашањето околу промената на Уставот, како дел од кампањата која што кај македонскиот електорат доста пали бидејќи настаните и од другата страна на границата, перманентните блокади од Софија, кај македонското јавно мислење создадоа еден анимозитет кон одредени бугарски политичари.
– Сето тоа на еден умен популистички начин опозицијата го користеше претерувајќи и на тој начин практично самата себе се условува. Но доколку случајно успее да победи, создаде влада, практично ќе мора да остане на овој став барем доколку имаат политичка етика во своите ветувања, тогаш ќе мора да остане на тие позиции. Затоа многу е битна позицијата на албанскиот блок партии. Имено, овие партии можеби ќе бидат оној јаз што ќе одлучува кој ќе создаде влада после овие избори, и да се очекува продолжување на досегашната политика, нагласи тој.
Според него, американците имаат резерва кон однесувањето на разни политички гарнитури, бидејќи ако дојде до промена во овие многу стресни геополитички моменти се скептични дека на новата влада составена од сегашната опозиција на тој брод може да помине и Левица и некој трет, и тоа би било вон посакуваните рамки на однесување.
– Затоа од тука произлегуваат сомнежот. Позициите на ВМРО-ДПМНЕ, нивните визии се практично на еден поглед, мислам анти европски, а повикувајќи се на одредени и поранешни манифестации, малку се и проруски. Затоа овие избори би рекол се од стратешко значење како за Република Северна Македонија, така и за целата популација што живее на оваа територија, потенцира професорот Нано Ружин.
И премиерот и лидер на СДСМ, Димитар Ковачевски изјави дека граѓаните на избори ќе можат да изберат дали ќе гласаат за коалицијата составена од „Европски фронт“, или од друга страна, како што вели, коалицијата која е против членството во ЕУ.
– Овие избори нема да бидат избори меѓу левица и десница. Овие избори ќе бидат меѓу Западот и Истокот. Во 2024 година такви ќе бидат изборите. Вообичаено во светот изборите се со централно-левичарски партии и централно-десничарски партии. Кај нас ќе има избори на кои ќе се соочат политичките партии кои се западно ориентирани и партиите кои се источно ориентирани, изјави Ковачевски.
Првиот вицепремиер на Владата и висок функционер на ДУИ, Артан Груби, на панел дискусијата „На патот кон ЕУ: Искористување на можностите за брза интеграција“, рече дека рускиот претседател Владимир Путин сака да ја дестабилизира Северна Македонија.
– Замислете, имаше изјави од министерот за надворешни работи Лавров и неговата портпаролка Захарова, како и од претседателот Путин, кој ги познаваше сите села во Северна Македонија и ги спомна во своите интервјуа во меѓународните медиуми и рече дека огнената крстосница за Русија во врска со проширувањето на НАТО, е Северна Македонија. Ова е изјава цитирана од Лавров, а потоа Путин во своите медиуми, спомнувајќи ја и с.Грушинце – Куманова во своите интервјуа, за да покаже како ги познава сите села во Северна Македонија, за да поттикне тензии меѓуетнички конфликти меѓу Албанците и Македонците, до трагичните случаи што се случија во нашите градови, рече Груби.
Тој подвлече дека сите знаат дека има руски експоненти, дека има руски елементи, кои прават сè што е во нивна моќ да го уништат парламентарното мнозинство и коалиција, која сака да ја види оваа земја како членка на НАТО и членка на ЕУ и во децениското пријателство со САД.
Дестан Јонузи / Фронтлајн