Новиот француски претседател Емануел Макрон беше пречекан вчера во Берлин како рок ѕвезда. Толку топло и срдечно што тоа наликуваше на првата посета на Барак Обама во Германија. На почетокот на разговорот помеѓу Ангела Меркел и Макрон, германската канцеларка дури излезе на балконот на својата канцеларија за ја го поздрави со рака насобраната толпа.
Меркел дури изјави дека “е можно да се влезе во преговори за нова европска повелба доколку тоа има смисла”, перспектива за која канцеларката досега не сакаше ни да зборува.
Најмоќната жена на светот вчера покажа отвореност кон младиот шеф на француската држава. Берлин беше првото негово патување во странство за да се покаже дека Франција и Германија се моторот на ЕУ.
Макрон и го презентираше на Меркел својот план за реформа на ЕУ. Овој план, за кој Макрон зборуваше за време на изборната кампања, беше критикуван во Берлин.
Германија се наоѓа на само четири месеци од параламенарни избори па Меркел, која бара од Германците четврти мандат, не се многу расположена да зборува за реформи кои би можеле да бидат финансиски скапи за Германија и политички скапи за Меркел.
“Ова е историски момент за Европа”, рече Макрон објаснувајќи дека на континентот расте популизмот, постои реален ризик за разнебитување на ЕУ и токму од тие причини е потребна длабока реформа.
Таа реформа, според Макрон, треба да донесе новитети во еврозоната. Новиот француски претседател бара навистина длабоки реформи: воведување на посебен парламент и министерство за финансии на еврозоната. А Берлин стравува дека сето тоа ќе чини многу пари.
Макрон вчера, пред новинарите, ја повика Меркел да ги преземе своите обврски и да помогне во оваа реформа која без Германија не може да се спроведе. И за возврат вети дека во Франција ќе има реформи на внатрешен економски план за да може неговата земја да ја врати довербата на Германија.
А Меркел одговори позитивно на динамичниот и убедлив оптимизам на Макрон.
Проектот за реформа на Макрон подразбира промена на европската повелба, долг и понекогаш мачен процес за кој е потребна едногласност на сите членки на ЕУ. Тој ја увери Меркел дека е против досегашниот начин на справување со јавниот долг на земјите членки во кој од Германија се очекуваше секогаш да плаќа.
Меркел е уверена дека Германија треба да стори се за да му помогне на Макрон успешно да ја води Франција во наредните пет години и да се справи со големата невработеност. Кошмарот на Берлин е можна победа на екстремната десница на следните претседателските избори во 2022 година. Тоа е сосема можно доколку Макрон не ги оствари своите ветувања дадени на Французите. Па така, Германија ќе стори се да не му го комплицира политичкиот живот на Макрон, изјави екс претседателот на Франција Франса Оланд пред неколку дена кога дојде на проштална посета во Берлин.