Германската канцеларка Ангела Меркел побара сите земји од ЕУ да склучат „договор за нешпионирање“ со САД, како што се стремат да потпишат Франција и Германија по тврдењата дека Вашингтон го прислушувал нејзиниот мобилен телефон.
Портпаролот на германската Влада вчера потврди дека Меркел упатила таков предлог до европските лидери на самитот во Брисел.
Обвиненијата дека американската Агенција за национална безбедност имала пристап до десетици илјади листи со преведени телефонски разговори од Французи, како и дека го прислушувала телефонот на Ангела Меркел предизвика бес низ Европа. Германија вчера објави дека следната недела ќе ги испрати шефовите на разузнавачките служби во Вашингтон, каде ќе бараат објаснување од Белата куќа за тврдењата.
Меркел, претходно, најави дека очекува Берлин и Париз да склучат „договор за нешпионирање“, додавајќи дека од претседателот Барак Обама очекува не само зборови на извинување, туку и конкретни дејствија.
Пред два дена, Германската канцеларка Ангела Меркел оцени дека довербата меѓу САД и нивните сојузници треба одново да се воспостави, откако беше откриено дека американските тајни служби ги следеле комуникациите на нејзиниот мобилен телефон.
Меркел соопшти дека на американскиот претседател Барак Обама во телефонски разговор му порачала дека „шпионирање меѓу пријатели не оди“. Таа рече дека меѓу сојузници мора да постои доверба и „таа доверба сега треба одново да се гради“.
Меркел понатаму вели дека нејзината загриженост не е поради загрозувањето на нејзината сопствена приватност, туку поради приватноста на германските граѓани.
По телефонскиот разговор на Меркел и Обама, Белата куќа соопшти дека американските
служби „не ги следат и нема да ги следат комуникациите на германската канцеларка“, но надлежните одбија да одговорат дали тоа било правено во минатото.