Северна Македонија ги исполни сите демократски услови за почеток на пристапните преговори со ЕУ, но се прејде во навика таа земја „да се шутира“ кога и да му одговара тоа некому, изјави хрватскиот претседател Зоран Милановиќ, откако официјална Софија ги осуди неговите изјави за бугарската политика кон европската интеграција на Северна Македонија.
„Тоа не е во ред. Таа држава, а и тој народ, досега платија доста висока цена. Тие играат по правилата и се за пример. Ги исполнија сите демократски услови што човек може да ги замисли, а тоа се повеќенационални заедници во кои има многу Албанци и таа соработка е за пример“, рече денеска Милановиќ во одговор на новинарско прашање.
Потсети дека земјава, меѓудругото, го промени името на барање на Грција и додаде дека Северна Македонија е жртва на недостиг на интерес и основна емпатија.
„Тоа не се прави во 21. век. Тоа апсолутно не е основа за утрешниот соживот во Европската Унија“, рече Милановиќ.
По налог на министерот за надворешни работи на Бугарија, Светлан Стоев, вчера во бугарското МНР беше повикана на разговор хрватската амбасадорка во Софија Јасна Огњановац. Како што јави дописникот на МИА од Софија, таа била примена од генералниот директор за европски прашања, Румен Александров. Причина за разговорот била изјавата на хрватскиот претседател Зоран Милановиќ по Самитот на Словенија и Хрватска со земјите од Западен Балкан, одржан на 17 мај 2021 година во Брдо кај Крањ, во која тој ја нападна политиката на Бугарија кон евроинтеграцијата на Северна Македонија.