Седум пратеници гласаа „против“ предлогот на Антонио Милошоски, а пет „за“ лично претставување пред пратениците на кандидатите за уставни судии и поради тоа овој предлог не помина на Комисијата за избори и именувања.
Претходно, пратеникот Антонио Милошоски образложи дека ако им се даде на предложените кандидати можност да излезат на собраниската говорница и да одговорат и на поставените прашања ќе се отстранат сите сомнежи дека ќе бидат избрани уставни судии кои не ја заслужуваат довербата.
„Не знам од што се плашите, ако кандидатите излезат пред јавноста па таа нека суди која е поистакната правничка Тања Васиќ или професорката Родна Живковска, односно Васиќ која пред некопку месеци магистрирала, а нејзин ментор била професорката Живковска, рече пратеникот Милошоски.
Пратеникот Бојан Стојаноски предложи за сите девет кандидати за уставни судии да има по една седница на комисијата за да можат тие да одговорат и на прашања на пратениците. Така, според Стојановски ќе се отстранат сите дамки и сомнежи дека за уставни судии ќе бидат избрани правници кои се истакнати во својата фела, како што впрочем бара и законодавецот.
Претпладневниот дел од комисиската седница помина во процедурални забелешки, така што расправата не ни почна. Се очекува по пауза од половина час пратениците да ја продолжат дебата за избор на тројца уставни судии од предложени девет.
Пратеникот Антонио Милошоски на почетокот на денешната расправа на Комисијата за избори и именувања за предлозите на владејачкото мнозинство и на опозицијата за уставни судии, побара секој предложен кандидат да реферира пред пратениците за јавноста да има претстава кој ќе биде избран за член на Уставниот суд.
Овој предлог според владејачкото мнозинство, како што рекоа, не е во рамки на Деловникот на Собранието, и досега кандидатите за уставни судии немале обврска да се претставуваат лично пред пратениците. На тоа Милошоски реагираше дека ако владејачкото мнозинство не го прифати предлогот ќе остави сомнеж во јавноста дека се сака да се сокрие нешто. Милошоски рече дека од личното обраќање и претставување на кандидатите ќе имаат придобивка сите, затоа што меѓу предложените има кандидати кои се познати и признати со својот минат труд, но има и такви кои, како што рече пратеникот, освен што смениле три министри работејќи во нивните кабинети немаат свој придонес, ниту пак се истакнати во правната фела.
Уставниот суд сега работи без четворица судии на кои им истече мандатот од вкупно девет колку што брои. Во нецелосен состав е околу една година, откако кон крајот на мај лани им истекоа мандатите на тројца судии – Сали Мурати, Елена Гошева и Никола Ивановски. Кон средината на јануари годинава, пак, му заврши мандатот и на судијата Јован Јосифовски. На неодамнешната прес-конференција, пак, претседателката на Уставниот суд Добрила Кацарска предупреди дека уште еден уставен судија заминува во пензија на крајот на оваа година.
Собраниската Комисија за прашања на избори и именувања, по речиси една година откако Уставниот суд работи со намален број на судии, на 13 мај ја почна процедурата за избор на нови уставни судии.
Предложени се девет кандидати. Пратениците од власта ги предложија републичкиот јавен обвинител, Љубомир Јовески, граѓанскиот судија во Апелациониот суд во Скопје, Фатмир Скендер и Тања Васиќ Бозаџиева која работи во Министерството за правда како државен советник за граѓанско законодавство.
Пратениците од опозициската ВМРО-ДПМНЕ предложија шест кандидати: универзитетските професори Саво Климовски и Родна Живковска, судијата во пензија, Бранко Секуловски, обвинителот Тодор Витларов, судијката од Управниот суд, Весна Јовановска и Војислав Димовски, јавен обвинител од Основното јавно обвинителство во Охрид.
Стојанка Митреска