Бубрежно болните на дијализа доколку престојуваат во странство ќе може да користат дијализа која минимално ја плаќа државата. Сумата која ќе ја покрие Фондот е 80 евра колку што чини дијализата во Македонија, а болните ќе може да ја користат најмногу до 30 дена.
Од Здружението „Нефрон“велат дека е добро што конечно Фондот го покрена ова прашање, но потенцираат дека разликата во сумата е голема во земјите од западна Европа, а пациентите тоа ќе мора да го плаќаат од свој џеп.
-Една дијализа во некоја од соседните земји како Србија иили Црна Гора чини 150 евра, а во Брисел од 500 до 600 евра. Во Германија цената се движи околу 400 евра, а во Норвешка дури 700 евра. Значи остатокот од парите пациентот ќе треба да ги доплати сам изјави за НОВА Душко Георгиевски од Нефрон.
Сепак, тој потенцира дека ова е вовед во нивното залагање Македонија да склучи меѓународен договор со кои странските пациенти ќе може да користат дијализа кај нас, а нашите тоа да можат да го направат бесплатно при престојот во некоја од државите во странство.
Во Здруженито велат дека многу граѓани како адвокати, судии, инжинери и од други јавни професии се принудени службено да патуваат во странство, а при престојот дијализата ја плаќале самите или пак се откажуваат од патување.
За други граѓани кои неможат да си го дозволат тоа, патувањето во странство да си ги видат најблиските е практично невозможно.
Инаку, Македонија е една од земјите со најниска цена на дијализата во Европа.