Нема одговор од Министерството за здравство дали ќе го испитаат случајот на 25 годишниот Влатко Трпевски кој починал на 17 август, само неколку часа откако бил примен во Градската хируршка болница „Св. Наум Охридски“.
Неговите родители уште пред месец и половина поднеле барање до Министерство, да се испита дали има пропусти во лекувањето и да им се одговори, од што починал нивниот син. НОВА веќе три дена се обидува да дознае дали министерот Тодоров, кој во многу прилики тврди дека е на страната на пациентите, ќе формира комисија за да го испита случајот.
Семејството Трпевски тврди, дека смртта на нивниот син е обвиткана во мистерија, со многу нејаснотии. Тие сакаат да знаат што се случувало од моментот кога бил задржан на лекување, за време на операцијата на која што починал, потоа зошто се криеле резултатите од патологија. За нив е нејасно, зошто отпусната листа ја добиле дури по два месеци, но и од кои причини не е направена обдукција веднаш, која во вакви случаи е задолжителна со закон.
-Сакам да знам од што почина мојот син, дали е лекарска грешка, пропуст во лекувањето, имам овде во документите многу невистини, се ова ми отвара сомнеж, рече во изјава за НОВА Марија Трпевска мајка на починатиот Влатко.
Родителите велат дека лекарот кој го оперирал им кажал дека нивниот син искрварил за време на операцијата.
Директорката Јасминка Чабуковска не ја потврди оваа информација.
-Имам право на заштита на лични податоци и не мора да ви кажам од што почина пациентот. Доколку семејството смета дека нешто не им се допаѓа , не им се ускратени правните механизми, постои суд, може да побараат правна разрешница и нема потреба овој случај медиумски да се покрива, изјави видно вознемирена и со висок тон Чабуковска.
Таа негира дека дури по две месеца им е дадена отпусната листа.
НОВА од лекарски извори во болницата дознава дека Трпевски имал анеуризма на абдоменалната аорта, на која лекарот, васкуларниот хирург проценил дека треба да стави протеза. За време на операцијата при ставање на бајпас, се покажала особена осетливост на крвните садови и пациентот искрварил и починал.
Но, она што деновиве се зборува во лекарските кругови е дали ваква комплицирана и ризична операција треба да се врши за време на дежурство, во недела, без комплетна екипа на васкуларни хирурзи.
Нашите извори, велат дека должност на хирургот кој бил дежурен, како шеф на екипа била да ја организира работата и да повика стручно лице, што тој очигледно го сторил. Но, прашање е, велат нашите извори дали васкуларниот хирург бил доволно искусен за ваква интервенција и зошто не биле повикани двајца постари и искусни лекари од оваа област кои оперираат во болницата.
-Телото обично се чува во болницата два часа по смртта, а потоа се праќа во капела или на обдукција. Но, во ваков случај недозволиво и незаконски е што телото не било пратено на обдукција, велат лекарски извори од болницата за НОВА.
Ова вчера за НОВА го потврдија и на Институтот за судска медицина, каде објаснија дека во вакви случаи не се прашува семејството бидејќи судско медицинската обдукција е задолжителна. Според процедурата болницата била должна да го извести јавниот обвинител или дневниот оперативен центар во МВР, во спротивно тоа е прикривање на кривично дело, изјави за Алексеј Дума, директор на Институтот за судска медицина.
-Не ми е познат случајот, но можам да кажам дека, кога смртта не е јасна и настапила во текот на терапевтска или дијагностичка интервенција, судско медицинска обдукција е задолжителна, дециден е професорот Дума.
Семејството Трпевски, се надеваат и веруваат дека министерот Тодоров ќе го испита случајот, а директорката Чабуковска која одбива да ги прими на разговор, конечно ќе објасни зошто телото било чувано цела ноќ и половина ден во болницата, се до моментот кога таткото потпишал да не се врши обдукација. Тој претходно цело претпладне го барал телото на синот на Судска медицина и Патологија мислејќи дека веќе е извршена аутопсијата, а починатиот син го пронашол во некоја кабина во Градска хируршка болница.