Завршени се протестите во Мостар каде што беа собрани околу 700 граѓани и претставници на невладини организации.
Сараевската Алапашина улица која беше блокирана поради денешните демонстрации сега е преодна.
Мал број на демонстранти сеуште се наоѓаат пред Али-пашината џамија. Се очекува демонстрациите во Сараево целосно да прекинат денеска а од утре да продолжат.
Според заменик-претседателот на СДА, Бакир Изетбеговиќ, вонредни избори се единствен начин да се реши сегашната криза во Босна и Херцеговина и дека треба да бидат спроведени најдоцна до месец мај годинава.
Изетбеговиќ пред новинарите во Сараево исто така напомена дека владејачките хрватски и српски партии не го поддржуваат предлогот, а затоа високиот претставник на меѓународната заедница во БиХ треба да интервенира како би се наметнале измени во законот.
Во пресрет на утрешниот состанок на Пленумот граѓани и граѓанки од Сараево кој ќе се одржи попладне, денес во текот на денот се појавија летоци кои ги повикуваа граѓаните на собир. Меѓутоа од иницијативниот одбор на пленумот, отфрлија секаква поврзаност со летоците.
„Зад нас не стојат никакви партии ниту организации. Ние најдобро знаеме дека зад нас стои долгогодишно понижување, глад, беспомошност и безнадежност на сите нас. И затоа викаме „не“ на политичките манипулации. Нема договор зад затворени врати, нема избрани…не даваме никој да ни го украде граѓанскиот бунт“, се вели во одговорот на иницијативниот одбор на пленумот.
Инаку, протестите во Босна и Херцеговина траат речиси една недела, а изминатите денови гореа зградите на претставништвата откако се судрија полицијата и демонстрантите.