Инспекторите кои го уништуваат хемиското оружје на Сирија завршија со испитувањето на претпоследниот пункт, со што им останува уште еден, последен во воено-разурнатата земја.
Заедничката мисија помеѓу Организацијата за забрана на хемиско оружје и на Обединетите нации, верификуваше 22 од 23 места откриени од страна на Дамаск.
Последното, во Алепо, беше едно од двете кои не можеа да се посетат порано поради безбедносни причини, се вели во соопштението на мисијата.
„Според декларацијата од страна на Сирија, местото беше потврдено како демонтирано, одамна напуштено, а градбата покажува штети од голема битка“, се вели во соопштението.
Но, додека истражувањето е во напредна фаза, САД е во потрага на нови доверливи разузнавачки информации кои укажуваат дека Сирија нецелосно ќе ги предаде залихите со хемиско оружје, јавува CNN.
„Информациите“ не се дефинитивни, но „постојат неколку низи од информации кои ќе ја разнишаат нашата доверба“, вели еден американски официјален претставник. „Тие неодамна направија неколку работи кои укажуваат на тоа дека Сирија не е подготвена да се ослободи од целата количина на хемиско оружје“.
CNN објавува дека разговарале со неколку претставници на САД, кои ги потврдиле овие информации. Сите побарале да останат анонимни поради чувствителноста на информацијата.
Разузнавачките агенции на САД, Министерството за одбрана, Стејт департментот и Белата куќа моментално ги разгледуваат информациите.