Министерството за надворешни работи на Република Македонија, во врска со добиената информација за забрана на влез на новинарката Ивана Костовска во Грција, го истакнува следното:
„Изненадени сме од одлуката на грчките погранични органи кои на 2 јуни 2013 година не и дозволија влез на уредникот на надворешно-политичката редакција на весникот „Дневник” Ивана Костовска, која патувала приватно во Грција.
Не навлегувајќи во дискреционите права на надлежните органи на секоја суверена држава, Министерството за надворешни работи би сакало да укаже дека регистрирањето на новинарот Костовска како опасност за јавниот ред и безбедност, јавното здравје и меѓународните односи и оттаму како непожелна личност во Грција, претставува кршење на една од основните демократски слободи – слободата на движење.
Уште повеќе, наведените причини заради кои не и се дозволува влез под превезот за заштита на националната безбедност на Грција, може да се протолкуваат како санкционирање на новинарскиот збор и досега објавените авторски текстови на Костовска за состојбите и политиките на Грција, метод користен во некои одамна заборавени времиња“.