Повеќе студенти при вчерашната полициска акција на Единицата за брзо распоредување за време на изборите за студентски лидер, беа повредени со рани и модрици.
Студентскиот пленум објави фотографии на дел од студентите на кои се гледаат модринки и крв од буткањето за кутиите во кои се наоѓаа гласовите за студентските избори.
Единиците за брзо распоредување на полицијата вчера насилно влегоа во седиштето на СПУКМ каде што претставници од студентскиот пленум ја блокираа вратата од просторијата во која беа приврзаниците на претседателот на Студентскиот парламент Кирил Спироски.
НОВА во врска со вчерашните настани околу студентските избори од МВР побара одговори, зошто на собирот пред студентскиот дом Кузман беа присутни припадници на ЕБР, под чија команда беа испратени и зошто употребија сила против студентите, за што сведочат и видео записи, но засега оттаму немаме одговор.
И покрај скандалозниот начин на кои се одвиваа изборите, денеска Студентскиот парламент на УКИМ соопшти дека за нов претседател е избран Давор Поповски, кој беше кандидат за едно со Стефан Василевски.
Според СПУКМ од вкупно 5.264 гласови, Поповски освоил 3.851 гласови, додека Василевски 1.275, а 138 биле неважечки.