Федерика Могерини, шефицата на ЕУ дипломатијата, се сретна денес со новиот спикер на Собранието Талат Џафери во Брисел “на неговото прво официјално патување во странство”, подвлекува Могерини во соопштението што го испрати по разговорот.
Таа повторно, во името на ЕУ, најсилно го осуди насилството во Собранието против пратениците и новинарите и го поздрави изборот на Џафери како претседател на законодавниот дом од мнозинството пратеници.
Могерини подвлече дека оваа функција “мора да биде над партиската и меѓу-етничката политика а претседателот треба да работи во корист на сите граѓани и заедници”.
“ЕУ е подготвена да работи со него, со Собранието и со сите други институции за да оди напред во Итните приоритетни реформи како и примената на договорот од Пржино”, вели таа.
Могерини сакала да знае како новиот спикер понатаму ќе постапува и му пренела дека “ЕУ очекува сите политички партии да влезат во конструктивен политички процес во Собранието, вклучително и во формирањето на нова влада”, порака која му е упатена пред се на ВМРО-ДПМНЕ од која се очекува да биде конструктивна опозиција за доброто на земјата.
Извори на НОВА во Брисел додаваат дека ЕУ од Македонија очекува што е можно побрза нормализација на состојбата, нормално работење на Собранието и состав на нова влада за да може да се премине од разговори за стабилизација во разговори за европска интеграција.
Односите на Македонија со ЕУ се одамна под мраз и време е, велат во ЕУ, нормалната работа да продолжи бидејќи тоа е од клучна важност токму за Македонија и нејзините граѓани.