Боливискиот претседател Ево Моралес ги обвини САД дека ја „хакирале“ електронската пошта на службениците на Владата на јужноамериканската земја, а тој самиот токму поради тоа не користел е-мејл, односно ја згаснал својата електронската пошта.
– Разузнавачките агенти на САД имаат пристап до електронската пошта на највисокото раководство на Боливија, рече Моралес.
Моралес вели дека таа информација ја добил од колега на самитот на Организацијата на јужноамерикански заеднички пазар (МЕРКОСУР) во петокот во главниот град на Уругвај, Монтевидео, а додал дека САД го прави тоа за да им ги освои природните ресурси.
Претседателот на Боливија, рече дека од 2006 година, кога дошол на власт, имал и-мејл, но по совет на експертите се откажал од негово користење.
Минатата седмица се случи димпломатски скандал кога европските власти го пренасочија авионот на Моралес во Австрија од Москва, поради гласини дека во него се наоѓа Едвард Сноуден, поранешен соработник на ЦИА, кој ја обелодени програмата на шпионирање на САД.
Моралес синоќа повторно изрази подготвеност да му даде азил на Сноуден, следејќи ги сите „дипломатски правила и меѓународни договори“.