Традиционалната воена парада во Москва по повод одбележувањето на годишнината од победата над фашизмот во Втората светска војна, претседателот на Русија, Владимир Путин ја искористи за да ја поздрави „силата на триумфалниот руски патриотизам“.
– Ова е ден на триумфот на непобедливите патриотски сили, кога сите ние особено силно чувствуваме што значи да се биде посветен на татковината и колку е важно луѓето да бидат во состојба да ги застапуваат своите интереси, порача рускиот претседател.
Путин рече дека Денот на победата и натаму е главен празник во Русија.
– Од завршувањето на Големата патриотска војна поминаа 69 години, но 9 мај е и ќе биде наш главен празник. Тоа е ден на националниот триумф и националната гордост, ден на жалост и вечно паметење, изјави тој.
Во традиционалната парада на Црвениот плоштад учествуваа над 11.000 војници и офицери, полицајци, како и кадети на воените колеџи и академии и на воената поморска школа.
Воени паради традиционално се одржуваат во уште осум градови кои носат титула на „градови херои“ – Севастопољ, Керч, Санкт Петербург, Смоленск, Мурманск, Тула, Новосиријск и Волгоград.