Општина Виница вработува советник за урбанизам, а потенцијалните кандидати, меѓудругото, може да имаат завршено и музичка академија. НОВА тргна по одговори од институциите дали овој критериум во огласот за јавен службеник е согласно законот или не и како би можел, да речеме, дипломиран пејач да биде ефикасен урбанист.
Во Одделенијата за урбанизам, има неколку услови кои апликантите за државни службеници треба да ги поседуваат, а покрај архитектурата и градежништвото, според раководителите во овој сектор во Виница, може да ви успее и како музичар.
Откако социјалните мрежи беа преплавени со иронични реакции за јавниот оглас на Општина Виница во кој под графата „Посебни услови“,покрај „Архитектура, урбанизам и планирање“, „Градежништво и водостопанство“ еден од условите е и „музички уметности“, НОВА се обрати до општината.
При телефонскиот разговор со објавувачот на огласот, бевме упатени одговорот да го побараме кај раководителката во Одделението за човечки ресурси, која кратко ни одговори дека огласот бил „по систематизација, со услови усогласени од Министерството за информатичко општество“ по што го прекина телефонскиот разговор.
Понатамошните контакти со надлжените во оваа општина беа оневозможени, па така, не добивме одговор на нашите прашања околу дилемите кои веќе се поставија во јавноста: дали е ова уште еден од оние огласи во кои однапред е јасно кој кандидат ќе победи. Граѓаните паметат и слични вакви огласи во државната и јавна служба, како на пример оној кога Министерството за одбрана бараше готвач со завршени студии по француска книжевност.
Нецелесен одговор добивме и од Министерството за информатичко општество и администрација бидејќи тие се одговорни да дадат согласност за објавувањето на огласите за вработување на институциите и да проверат дали се е по законот.
„Во однос на видот на високото образование за секое одделно работно место, критериуми се утврдени во членот 17 став (4) Правилникот за содржината и начинот на подготовката на актите за внатрешна организација и систематизација на работните места, како и содржината на функционалната анализа на институциите на јавниот сектор, при што е пропишано дека видот на високо образование се утврдува преку наведување на најмалку едно, а најмногу три научни полиња кои соодветствуваат на описот на работното место, содржани во меѓународната Фраскатиева класификација утврдена во Уредбата за нормативи и стандарди за основање на високообразовни установи и за вршење на високообразовна дејност“, се вели во дописот до НОВА од страна на министерството.
Тие тврдат дека во овој конкретен случај се било според актот за систематизација и министерството не сторило никаков пропуст во процедурата за давање согласност за овој оглас.
НОВАТВ се уште чека одговор на дополнителни прашања кои ги испративме до министерството каде што бараме да појаснат дали музичките уметности се едно од сродните полиња за работа како советник за урбанизам и зошто, на пример, се дискриминирани другите уметности како ликовни уметности, книжевност и други, кога веќе уметноста се смета за сродно поле од сферата на урбанизмот и градежништвото.