Украинската полиција соопшти дека гасоводот Уренгој-Помари-Ужгород, уште познат и како Транс-сибирски гасовод, бил оштетен од експлозија која се случила во североисточниот украински регион Локвиција, објавува Дојче веле.
Полицијата уште истакна дека во експлозијата немало загинати или повредени. Украинскиот државен концерн за транспорт на гас „Укртрансгаз“, пак, соопшти дека изгледа оти експлозијата нема да влијае врз протокот на рускиот природен гас кон Запад.
Украинското министерство за енергија во меѓувреме сугерираше дека денешната експлозија би можела да биде „терористички напад“.
„Ова не е прв обид за терористички напад врз украинскиот систем за транспорт на гас“, соопшти Министерството во Киев, притоа алудирајќи на двете експлозии на транзитните гасоводи во западна Украина во мај годинава.
Транс-сибирскиот гасовот долг 4.500 километри, кој минува преку Украина, ги поврзува руските гасни полиња со корисниците на гас во Средна и Западна Европа.