И покрај тоа што грчката коалициона влада, во која доминираат конзервативците, планира да го одработи целиот свој мандат и следните парламентарни избори да се одржат во јуни 2016 година, сепак можно е Грците да излезат на гласачките места на почетокот на 2015 година, пишува грчки „Етнос“.
Весникот образложува дека е малку веројатно оти двете партии во владината коалиција – Нова демократија и ПАСОК, ќе можат да соберат 180 гласа во Парламентот за да изберат претседател на земјата и да избегнат предвремени парламентарни избори.
Согласно Уставот на Грција, шефот на државата се избира од страна на Парламентот на земјата. Гласањето за избор на нов претседател треба да се одржи на почетокот на 2015 година.
Конзервативната Нова демократија во моментов располага со 127 пратеници, а социјалистичкиот ПАСОК со 28. Двете партии заедно имаат 155 пратеници, што претставува многу тешка, но не и невозможна задача, за да го обезбедат неопходното мнозинство од 180 пратенички гласа за избор на претседателот. Ова мнозинство му е неопходно на сегашниот кабинет на Самарас за да преживее и да ги избегне предвремените парламентарни избори, оценува весникот „Етнос“.
Мандатот на сегашниот претседател Каролос Папуљас истекува на 12 март 2015 година.
Грчкиот Устав предвидува три круга на гласање при изборот на шеф на државата. За избор на претседателот во првиот круг на гласање потребни се 200 пратенички гласа. Тој треба да се оддржи еден месец пред истекот на мандатот на актуелниот претседател, односно на 12 февруари 2015 година. Има варијанта гласањето да се одддржи и порано доколку тоа го побара Владата. Ако ни при второто гласање ниту еден кандидат не освои 200 гласа, се одржува трет круг, во кој за победа се потребни 180 гласа. Ако претседателот не биде избран ни по третиот круг на гласање, Парламентот се распушта и се свикуваат предвремени парламентарни избори.
Двете владејачки партии – Нова демократија и ПАСОК, се обврзани за претседателската функција да предложат лице кое не потекнува од нивните редови, што како најсериозни кандидати ги истакнува Фотис Кувелис, лидер на Демократската левица (ДИМАР), доскорешен партнер во владејачката коалиција, и Никос Констандопулос, поранешен лидер на опозициската Коалиција на радикалната левица (СИРИЗА).