Со претставата „Мртва точка“ во режија на Раду Африм и театарот „Тома Карагиу“ од Романија, вечерва во 21.00 часот во Универзална сала се спушта завесата на овогодинешниот 41 МОТ.
Претставата раскажува приказна за млада жена по име Ника (на грчки Ника значи „победа“), која стои колебајќи се помеѓу парализирачката депресија и потребата да продолжи да живее по смртта на нејзиниот сопруг. Во потрага по излез од нејзиниот загушувачки стеснет свет, таа ја напушта работата во банка и наоѓа утеха во бучната индиферентност на улиците на големиот град. Нејзината средбата со една жена на семафор, отвора нова стварност.
Инаку Раду Африм е значајна фигура и енфант терибл на новата генерација романски театарски режисери – како што го опишува Ранди Џенер за American Theatre magazine. Како еден од режисерите за кои најмногу се зборува на континентот, Раду Африм е меѓународно признаен и неговата храбра, понекогаш контроверзна работа е угостена во најреномираните европски театри. Храбриот режисер е движечката сила за значајната тематска и естетска преродба во романскиот театар преку прикажување на писатели како: Деа Лоер, Василиј Сигарев, Ханох Левин, Јон Фосе, Жан-Лук Лагарс и Дејвид Крег пред романската публика. Раду Африм е исто така добитник на најзначајните театарски награди како: UNITER Award за најдобра режија во 2006, 2007 и 2015; Coup de Coeur de la Presse Award во 2008 на Festival d’Avignon; European Culture Award, доделена во 2009 од страна на EuroKultur Forum.
Во рамките на МОТ+ програмата во 18.00 часот во МКЦ регионална мрежа на академии „Театарска платформа“ составена од АДУ Загреб, ФДУ Белград, АУ Нови Сад, АСУ Сараево, ФДУ Цетиње, ФДУ Скопје и АГРФТ Љубљана ќе го презентира „Проект: Правда“. Се работи за седум кратки текстови на тема правда кои беа избрани на натпреварите спроведени на факултетите во Љубљана, Белград, Нови Сад, Цетиње, Скопје, Сараево и Загреб во 2013 година кога во склоп на „Театарска платформа“ на меѓународниот проект „Регионална мрежа на академии“ беше организирано јавно читање на студентски драмски текстови на тема правда. Потоа во текот на 2015 и 2016 година седум уметнички тимови од партнерските академии ги поставија драмските текстови кои се обединети и премиерно прикажани на 10. КРАДУ под заеднички наслов Проект: Правда.
Влезот е слободен.
Вечерта завршува со журка во МКЦ со DJ Гоце Саф.