Верниците од муслиманската вероисповед денеска го слават празникот Курбан Бајрам.
Со утринската молитва сабах-намаз, а потоа и со молитвата бајрам-намаз почнува тридневна прослава, во која почитта кон Алах муслиманите ја искажуваат со принесување жртва.
Курбан Бајрам е 70 дена по првиот Бајрам во годината, Фитр Бајрам, а го обележува денот кога е комплетиран Светиот куран.
Хуманизмот, хармоничните односи меѓу луѓето, меѓу човекот и светот и стремежот кон мир и благосостојба, како основни принципи на Исламот, на Бајрам се исполнуваат со посетување на роднините и пријателите и со честитки и добри желби за секој намерник.
Со овој празник се крунисува аџилакот, кој важи за петти темел на исламот, кој е доказ за солидарност и благосостојба.
Повеќе од два милиони Муслимани од целиот свет учествуваат на овогодишниот аџилак, на планината Арафат, во близина на Мека, во Саудиска Арабија, каде што според муслиманската религија пророкот Мухамед го одржал последното проповедање пред 14 век.
За аџиите Каба, коцкестата градба во средината на џамијата во Мека, е најсветиот дел храмот. Верниците кружат околу Каба за да го извршат обредот познат како Таваф и ќе останат таму се до мракот, молејќи се и рецитирајќи делови од Куранот, а потоа ќе се упатат кон рамницата Муздалифах, каде што ќе собираат камења за симболичкото каменување на сатаната во долината Мина. Потоа ќе го почнат искачувањето на гората Арафат, источно од Мека, што е кулминацијата на аџилакот.
Аџилакот е задолжителен за сите верници од муслиманска вероисповед барем еднаш во животот да го направат, доколку се финансиски спремни и имаат добро здравје.