Заменик министерот за политички систем и односи меѓу заедниците, Неждет Мустафа, и министерот без ресор задолжен за интеграција и имплементација на декадата на Ромите и кандидат за градоначалник за Шуто Оризари, Шабан Салиу, во телефонски разговор за ЦИВИЛ Медиа изјавиле дека не ја слушнале изјавата на директорот на Дирекцијата за заштита и спасување (ДЗС), Стојанче Ангелов, дадена во подкастот „На кавга со Иван“ на Канал 5.
Во подкастот, Ангелов изјави дека решението за депонијата Вардариште е „со сила да се реши проблемот со една ромска група“, која според него, е одговорна за палење отпад.
„Се оградувам, не мислам на сите Роми, да не бидам обвинет за шовинизам, расизам и така натаму. Но оние Роми коишто живеат во депонијата се тие што палат кабли за да го извлечат бакарот…“, изјави Ангелов.
Иако водителот Иван Мирчевски и Сотир Костов се обидоа да го коригираат, посочувајќи дека евентуално преселување мора да биде на хуман и достоинствен начин, не на сила, Ангелов категорично одговори:
„Јас сум за агресивна реакција. Мене ако ме прашувате јас би го решил тоа по кратка постапка, ги селам од таму… Ако е потребно и на сила“.
Актуелните функционери во Владата, Мустафа и Салиу, за ЦИВИЛ ветија дека ќе дадат изјава откако ќе ја слушнат целосната изјава на Ангелов, поврзана со „агресивната реакција и решавање на проблемот на Ромите по кратка постапка и по потреба и на сила“. До објавувањето на текстот, ЦИВИЛ не доби одговор од нив.
Извор: ЦивилМедиа