Вечерва Mинистерството за внатрешни работи упати демант за, како што се вели, сите непроверени лаги и манипулации објавени на одредени портали за наводно приведување на градоначалникот на Куманово. Ниту тој, ниту неговиот соработник, не биле приведени на информативен разговор, како што објавија порталите.
Според МВР, станува збор за полициска сообраќајна контрола. Откако било забележано лице кое од претходно и е познато на полицијата како управува возило на општина Куманово, возилото било запрено. Полициските службеници како што информира МВР констатирале дека лицето кое го управувало службеното возило на општината, не било вработено таму. Истовремено во општинското возило забележале материјали на една политичка партија и зеле примерок од листовите. Најавија дека за целиот настан ќе биде изготвен соодветен записник и ќе бидат известени и надлежните во општината за, како што се вели злоупотреба на возилото од лица кои не се вработени во општината.
Градоначалникот и неговите советници неповикани дошле во СВР Куманово. Се обидувале да појаснат дека, возилото му било дадено на лице, како што соопштува МВР, кое не било вработено во општината за „да го однесе возилото на миење“. МВР ги повикува политичките партии да се однесуваат достоинствено и да дозволат утрешните избори да бидат празник на демократијата.