МВР:Мигрантите бараат во Центарот за азил, но мора да ги почитуваме процедурите

МВР ја потврди информацијата на НОВА, дека во Центарот за мигранти во Гази Баба се случува бунт на бегалците. Но, нема детали што превземаат и дали бунтот е смирен.

„Мигрантите бараат да бидат префрени во Центарот за азил во Визбегово, но мора да се почитуваат процедурите. Ние се трудиме максимално но, процедурите се такви, изјави кратко за НОВА Деана Недељковиќ, советник за односи со јавност во МВР.

Народниот правобранител, Иџет Мемети најави дека уште попладне стручно лице од институцијата ќе го посети Центарот за мигранти во Гази Баба за да види што се случува таму и да отвори предмет. Утре изутрина екипа од Народниот правобранител детално ќе истражува што го предизвикало бунтот на бегалците.

„Утре ќе испратиме цела екипа, но случај ќе отвориме уште денеска. Имаме информации дека нешто се случува таму“, изјави за НОВА Мемети.

Народниот правобранител Мемети потенцира дека уште во 2012 година ги уочиле и регистрирале сите проблеми со кои се соочуваат мигрантите, од законските процедури, до лошите услови во Центарот.

„Уште оттогаш бараме промена на законската регулатива и подобрување на капацитетите каде што се сместени мигрантите бидејќи Македонија мора да ги прифати стандардите. Во нашите извештаи стои дека таму нема минимум стандарди за живот, во Центарот условите се ужасни“, изјави Мемети.

Како што објави НОВА во Центарот за мигранти во Гази Баба мигрантите се кренале на бунт. Жителите кои живеат во близина на Центарот слушнале силно викање и го снимиле видеото на кое се слуша како мигрантите викаат„Сакаме слобода„

Очевици на настанот велат дека граѓаните се вознемирени, не знаат што се случува во Центарот, а ситуацијата не се смирува.

Од Невладината Легис не знаат за што с е работи, дали се работи за пренатрупаност од бегалци, дали се бунтуваат поради лошите услови или пак, за некоја меѓусебна расправија. Од „Легис“ ги повикаа Народниот правобранител, УНХЦР и Црвениот крст да извршат надзор и да видат што се случува во Центарот.