Бугарската компанија „Комак медикал” ја прекинува работата на 31 јули, месец и половина откако ја започна вакцинацијата на граѓани на границата со Северна Македонија, потврди за дописникот на МИА од Софија сопственикот на фирмата и лекар Милен Врабевски.
Причина за одлуката, според Врабевски, е дека Северна Македонија обезбеди вакцини за граѓаните во различни градови во земјата.
Вакциналните пунктови на бугарската медицинска компанија работат во реонот на граничните пунктови Станке Лисичково-Делчево и Златарево-Ново село, меѓу двете држави и на жителите кои сакаа да се вакцинираат не им беа налагани ПЦР тестови за влез во Бугарија.
Досега 3.200 граѓани на С Македонија беа вакцинирани од страна на „Комак медикал” и ним им биле издавани сертификати за вакцинација, рече Врабевски за МИА.
Сите што се вакцинирале со една доза, ќе можат да ја примат втората до 31 јули.
Врабевски изјавил дека вакцините коишто беа ветени од бугарскиот претседател, Румен Радев, за С Македонија, се уште не се доставени.