Иванов не се сретнал со Папуљас, размениле само 2 збора,јавува дописничката за Канал 5 од Атина. Написите во грчките медиуми за наводната средба помеѓу двајцата претседатели дошле од текстот на дописникот од Скопје од грчката новинаска агенција АПЕ, кој пак веројатно се информирал од македонската агенција МИА, пишува Канал 5.
>>Прва средба Иванов – Папуљас
Извори за Канал 5 од претседателската палата велат дека за време на вечерата Иванов му пришол на Папуљас, размениле 2 збора, го поканил да пијат кафе, на што грчкиот претседател одговорил – ќе пиеме, но откако ќе се решат проблемите. Според извор на Канал 5 официјална Атина не пуштила ниту соопштение бидејќи не станало збор за официјална средба, туку за неформален разговор на вечерата.
Канал 5 информира и за денешните написи во грчките медиуми по реакциите околу обидите неформалниот разговор да се претстави како средба.
„Папуљас одговори дека со задоволство ќе се сретнат, но откако ќе се реши прашањето за името. Показател за „добрите“ намери на скопската страна е дека официјалната новинска агенција од ФИРОМ го претстави ракувањето како средба, наведувајќи дека Папуљас ја прифатил поканата на неговиот скопски колега“ – пишува Етнос, а пренесува Канал 5.
– По моја иницијатива првпат се сретнавме со грчкиот претседател и разговаравме отворено како луѓе за нашите две општества, за нашите граѓани и како можеме ние како претседатели да придонесеме да има една поголема соработка меѓу двете општества, бидејќи треба да ги следиме добрите односи, добрите трендови, кои почнаа да се случуваат меѓу граѓаните на нашите две земји – изјави Иванов по средбата во Загреб и дополни дека според него, Папуљас ветил нова средба.
– Остана да го продолжиме разговорот. Вети дека ќе имаме и друга можност повторно да разговараме. Така што ова го чувствувам како еден пробив, бидејќи од нашата независност досега немало средба меѓу грчки и македонски претседател – се пофали Иванов.
Веста за таканаречената средба ја објави Македонската информативна агенција МИА.