Пораката која „Шарената револуција“ вчера ја испрати до Никола Груевски и владејачката партија е дека на народот навистина му врие и во еден момент може да му дојде преку глава, коментираат долгогодишни политичари за НОВА.
Пораката која Груевски ја испрати дека народот нема веќе трпение е точна, но вчера народот покажа дека бара Груевски да се повлече, а не некој друг. Вака го коментира претседателот на Демократскиот сојуз, Павле Трајанов вчерашниот протест на Шарената револуција.
Според него, главната порака која ја испратиле масовните „шарени“ протести е дека е време за промени во Македонија.
„Протестот покажа дека ВМРО-ДПМНЕ и ДУИ немаат никаква поддршка и сега имаме едно граѓанско собирање кое има една огромна масовност, без некоја посебна организација. Граѓаните бараат промени и решение на кризата. Треба што е можно побрзо да се формира Влада која ќе спроведе реформи кои се неопходни за да се одржат избори“, вели Трајанов за НОВА.
Тој додава дека во сите авторитарни режими оние кои ги водат режимите, секогаш се повикуваат на народот. „Но токму тогаш се ближи крајот, народот се дига да, но не да ги поддржи лидерите на режимите, туку против нив“, додава Трајанов.
Ден пред големиот протест, претседателот на ВМРО-ДПМНЕ и екс премиер Никола Груевски во своето обраќање пред неговите сопартијци, по повод 26. роденден на партијата, порача дека „народот вриел“ и се повеќе граѓани од него барале поддршка за конкретна акција. Според него, учесниците во Шарената револуција се платеници, кои работат за туѓи интереси.
Силна граѓанска порака
Претседателот на НСДП, Тито Петковски смета дека пораката која вчера ја испратија демонстрантите е силна, а тоа е дека граѓаните не подлегнуваат на никакви уцени, притисоци и закани.
„Масовноста на протестот покажа дека граѓанската енергија се зголемува со заканите кои се упатени до нив. Реакција на граѓаните на говорот на Груевски е жестока а таа е дека Македонија ќе се демократизира и диктатурата треба да си замине“, вели Петковски.
Според Љупчо Балковски од ВМРО-НП, вчерашниот протест е уште еден потсетник за целокупното граѓанско незадолство со системот во Македонија.
„Шарената револуција постави неколку услови, но ете видовме дека ништо од тоа нема направено Владата. Вчера видовме и дека меѓународната заедница порача дека Пржинскиот договор мора да се почитува, како и работата на Специјалното јавно обвинителство.Четирите партии потписници на договорот од Пржино едноставно ќе мора да го испочитуваат она што го потпишале“, вели Балковски.
Вчера се одржа најмасовниот протест на Шарената револуција досега, кој заврши со обид за уривање на споменикот на „Прометеј“, како и демолирана фасада на Министерството за правда.
ВМРО-ДПМНЕ со осуда за протестот
Илија Димовски на прес конференција денеска го осуди вчерашниот протест на Шарената револуција нарекувајќи го „вандализам на хулигани од СДСМ и СОРОС“. „Вчера СДСМ го допре дното и покажа во каква политичка агонија се наоѓа. Народот јасно виде дека во партијата нема ниту една конструктивна идеја со која би се излегло на политички мегдан и дека сите капацитети на ова раководство на СДСМ се посветени на целосна деструкција, насилство и вандализам“, рече Димовски.