Претседателот на ВМРО-ДПМНЕ и екс премиер Никола Груевски во своето обраќање вечерва пред неговите сопартијци, по повод 26. роденден на партијата, порача дека „народот вриел“ и се повеќе граѓани од него барале поддршка за конкретна акција. Според него, учесниците во Шарената револуција се платеници, кои работат за туѓи интереси.
-Дека се губи трпението на народот, пред неправдите кои ги гледа, дека се повеќе како претседател на ВМРО-ДПМНЕ сум под притисок на илјадници граѓани кои на ралзичен начин ме контактираат, барајќи поддршка за поодлучна народна акција, дека ако вака продолжат, колку и јас и моите соработници да сме толерантни, нема да можам да ја држам ситуацијата под контрола. Народот врие и во еден момент може да му дојде преку глава и да влеземе во фаза која нема да e добра за земјата, а најмалку за оние кои глумат некакви револуционери за дебели пари и за туѓи интереси, рече Груевски.
Груевски обвини дека Специјалното обвинителство и опозициската СДСМ станале коалициски партнери.
Прославата по повод 26 години од постоењето на владејачката партија ВМРО-ДПМНЕ се одржува на летната тераса пред Музејот на ВМРО.
На прославата, присуствуваат неколку стотици одбрани гости, меѓу кои и премиерот Емил Димитриев, претседателот на Собранието, Трајко Велјановски, претседателката на Унијата на жените на партијата, Даниела Рангелова, Александар Пандов од ГДОМ, и други партиски членови и поддржувачи на партијата.
Слоганот на одбележувањето е „Идеја и дело – посилни од се.
ВМРО ДПМНЕ во историјата на независна Македонија била во власта два пати – еднаш од 1998 до 2011 кога кабинет формираше Љубчо Георгиевски и од 2002 наваму под водство на Никола Груевски. Тоа се и единствените партиски лидери кои се промениле во овие 26 години.
Минатиот роденден партијата го прослави пред новото партиско седиште во Центарот на Скопје со што зградата свечено беше ставена во функција. Таа е најобезбедуваната зграда во државата во моментов, заедно со Музејот на ВМРО кои се под полициска заштита 24/7 откога започнаа протестите.