Бараме малку повеќе почит од страна на лекарите, тоа што сме Роми не значи дека ништо не разбираме, ние се разбираме само бараме малку љубезност и разбирање од страна на лекарите. Установата каде што се вршат прегледите и вакцинацијата во Шуто Оризари е стара, сакаме да се реновира, да има повеќе лекари и медицински сестри, сакаме хигиената да е на повисоко нив. Со овие зборови ја започна својата приказна Љаљифа Демир, мајка на две деца од скопската населба Шуто Оризари.
„Сакаме подобри услови за нашите деца, за прегледи, за стоматолошки услуги, за матичен лекар. Немаме дежурна служба во ноќните часови, патронажните медицински сестри не можат да не најдат бидејќи има многу жени на листата, треба да има повеќе возила и повеќе патронажни сестри. Ние жените плаќаме гинеколошки прегледи бидејќи немаме матичен гинеколог во поликлиниката, рече Љаљифа Демир.
На Светскиот ден на здравјето, Ромите имаат слаб пристап до здравствени услуги. Десет години по декадата за инклузија на Ромите и првиот национален план за унапредување на здравјето на Ромите, состојбата на терен е катастрофална. Се уште кај ромските деца вакцинацијата е на многу пониско ниво од останатите деца и се движи од 55 до 95 проценти за различни вакцини. Истражувањето на ЕСЕ покажало дека не се користат буџетските пари наменети за Ромите
„ Од буџетските средства наменети за Ромите во периодот 2005-та до 2011-та година потрошени се само 1, 4 проценти од парите, изјави Борјан Павловски од ЕСЕ.
Невладината КХАМ која делува во регионот на Делчево, Пехчево и Виница, велат дека немаат партонажно возило и патронажните служби не можат да одговорат на потребите. Во цело Црник кое е одалечено 20 километри од Здравствениот дом, жените Ромки немаат финансиски средства да патуваат на лекар. Помалку од 30 проценти добиле покани за скрининг за рак на грлото на матка.
„ Жените немаат пари за патни трошоци и ние успеавме да обезбедиме мобилна гинеколошка екипа, така што 160 жени од село Црник и околу 200 жени Ромки од Виница го искористија правото на преглед во комбе„ рече Зоран Биковски од НВО КХАМ.
Додека надлежните од здравството организираат прослави за Светскиот ден на здравјето 7-ми април, овие луѓе си ги кажаа маките и проблемите со кои се соочуваат секојдневно. Годинешното мото на Светскиот ден на здравјето е „ За безбедна храна од нива до трпеза“.
Во Институтот за јавно здравје предупредуваат дека само минатата година од
болести поврзани со загадена храна со бактерии заболеле 909 луѓе од алиментарни инфекции , 204 биле заразени со салмонела, 162 имале инфекции со Eшерија коли, 40 со бруцелоза.
Иако заболените се од различна етничка припадност, сепак Ромите се најзагрозени бидејќи поради суспстандардните услови за живот немаат можност за одржување на хигиената на храната, немаат пристап до безбедна вода и свежи продукти.