Во текот на прославата на Новогодишната ноќ 30 млади луѓе, повеќето малолетни завршија на Клиниката за токсикологија, во алкохолизирана состојба или под дејство на психоактивни супстанци. Годинава доминираа машките, за разлика од претходните години. Најмлада девојка има само 14 години.
„Главно се работеше за интоксикации со алкохол, додека во три случаи биле со марихуана и со психоактивни супстанци како што се екстази и други разни таблети“, изјави Нестор Поповски директор на Клиниката.
Во Ургентниот хируршки центар при Универзитетската клиника за трауматологија, ортопедија, реанимација и интензивно лекување во текот на новогодишната ноќ во биле примени 63 пациенти, од кои 12 биле повредени во сообраќајна незгода, а шест во тепачка.
„Едниот пациент е оперативно згрижен, еден повреден е примен на Клиниката за неврохирургија кој е со телесни повреди и еден пациент со посериозни повреди е примен на Клиниката за реанимација и интензивно лекување и е на механичка вентилација. Сите други пациенти се во стабилна општа состојба,“ изјави др.Христијан Костов од Ургентниот хируршки центар.
На Клиниката за хируршки болести „Св. Наум Охридски“ прегледани 97 пациенти во текот на вчерашниот ден, од кои во попладневните и вечерните часови 43 луѓе. Од нив шест се повредени во сообраќајки, шест се повредени во тепачки, а останатите се со повреди при паѓање.
„Од нив се хоспитализирани тројца, една пациентка е од сообраќајка примена на Одделот за трауматологија со повреди на главата, а вториот случај е пациентка повредена при пад дома со фрактура на бутната коска и еден пациент е со перфориран чир на дванаесетпалачно црево кој не е дел од новогодишните прослави, но е опериран непосредно пред полноќ„, изјави директорката Јасмина Чабуковска.
Годинава новогодишната ноќ, за разлика од претходните години, според Чабуковска во однос на повредите поминала доста мирно.
Во Здравствен дом Скопје преку своите служби за итна медицинска помош и дежурните ноќни пунктови немало посебни проблеми.
„Во текот на новогодишната ноќ имаше вкупно 62 интервенции, од кои осум транспорти на алкохолни интоксикации и едно малолетно лице. Во раните утрински часови имаше сообраќајка со повреда на еден од патниците кој е транспортиран во Ургентниот центар. На осумте дежурни пунктови 135 граѓани побарале медицинска помош. Од овие 135 лица, три лица биле со алкохолни интоксикации, од кои едно лице било малолетно“, изјави Татјана Баевска Вучковиќ директорка на Здравствениот дом Скопје.