Најмалку 1.000 затвореници избегаа од затвор во Бенгази, најголемиот град во Источна Либија, соопштија либиски безбедносни служби.
Во затворот Ал Куфија избувна бунт, истовремено со напад од надвор. Избегаа најмалку 1.000 затвореници. Специјалните безбедносни сили побараа засилување. Сепак, тие добија наредба да не пукаат врз затворениците, изјави анонимен затворски службеник.
Според него меѓу затворениците имало и поврзани со поранешниот режим на Моамер Гадафи, но сепак најголемиот број затвореници биле осудени за помали криминални дела.
Неколку затвореници се фатени кратко време по бегството.
Премиерот на Либија Али Зејдан го потврди инидентот, но не објави колку затвореници успеале да избегаат.
– Локалното население изврши напад бидејќи не сакаат затвор во близина на своите домови, изјави Зејдан нагласувајќи дека граничните пунктови се информирани за инцидентот и дека им е доставен список со имиња на бегалците.
Зејдан претходно изјави дека граничните премини со Египет се затворени со цел да се спречи бегство на убијците на истакнатиот либиски активист, адвокатот Абдесалем Месмари.