Обдукцијата на починатиот Британец, бизнисменот Колин Џефри е завршена, се чекаат резултатите, одговори денеска на новинарско прашање министерот за здравство Никола Тодоров. Од што починал ќе и било дополнително соопштено на јавноста.
-Треба да се направи дополнителна микроскопска анализа, по што јавноста ќе биде известена за што се работи, рече Тодоров.
Веќе шест дена надлежните не излегле да ја соопштат причината за смртта на Колин Џефрин кој пред неколку години бил прв човек на Советот за странски инвеститори во Македонија, поранешен директор за стратегиски планирања во „Џонсон Мети“.
Телото на починатиот, под сомнение дека можеби бил заболен од ебола, се чуваше во посебна просторија на Инфективната клиника во лимен и дрвен сандак, се додека во саботата, лабораторијата во Хамбург утврди дека починатиот Британец немал ебола.
Тој немал крварење од сите делови на телото како кај еболата, туку внатрешно, ниту температурата на телото одговарала со таа на еболата, но сепак за надлежните се отвори сомнеж дека се работи за смртоносната болест.
Мистерија остана и случајот со листеријата кој ја тресеше македонската јавност два -три месеца. Повеќе од два месеца откако надлежните најавија дека ќе ги пратат резултатите во референтна лабораторија во странство нема одговор што покажале овие анализи.
Министерот Тодоров денеска само кратко одговори дека врз уште едно тело на заболен од листерија денеска била направена обдукција, се чекале резулатите.