Земјите на Западен Балкан мораат до пролет наредната година да покажат резултати за намалување на бројот на азилантите кои заминуваат во ЕУ, во спротивно ризикуваат укинување на безвизниот режим, изјави Cecilia Malmstrom, eвропски комесар за внатрешни работи, пренесува B92.
Malmstrom во Будва учествува на Министерскиот форум ЕУ–Западен Балкан во делот за внатрешни работи правда. На состанокот учествуваат десет министри за внатрешни работи, претставници на Советот на ЕУ, Интерпол, Еурпол и други европски институции и организации кои работат во овие области.
-Има една опасна појава. Четири пати е зголемен бројот на апликации за добивање на азил во земјите на ЕУ, а најголемиот број на граѓани се од земјите на Западен Балкан што е голем проблем, изјави Malmstrom за медиумите.
Таа потсети дека ЕУ ја усвои можноста за суспензија на визната либерализација во случај кога од некои земји ќе се зголеми бројот на илегалните емигранти, потенцирајќи дека одлуката стапува на сила на 9-ти јануари.
-Тоа значи дека ќе мораме, доколку се покаже за неопходно, да го укинеме безвизниот режим за некои земји, изјави Malmstrom.
Malmstrom потенцирала дека земјите на Западен Балкан треба да покажат повеќе резултати во сузбивањето на организираниот криминал.