Пописот во 2011 година пропадна поради тенденциите за намалување на бројот на Албанците во Македонија, изјави академик Абдулменаф Беџети во емисијата „Патот кон“ на Алсат.
Тоа била клучната причина поради која Беџети поднел оставка од функцијата потпретседател на Државната пописна комисија.
-Првата критична точка беше намалувањето на цензусот во градот Скопје. Со одредбите што ги предвидовме со Правилникот и начинот на реализирање, Скопје не би имало веќе 20,8% Албанци, колку што имаше со пописот од 2002-ра.
Прва опасност беше цензусот во Скопје да падне под 20%, а знаеме дека не е така, бидејќи Државниот Завод за Статистика секоја година известува колку е природниот прираст на населението, изјави Беџети.
Според Беџети, ако пописот бил реален, според трендот на наталитетот и морталитетот во албанските општини, процентот на Албанци во Скопје би требало да биде околу 24.
Покрај тенденцијата за намалување на цензусот во Скопје, со таков Правилник за пописот, ќе се намалел и вкупниот број на Албанците во Македонија- вели Беџети.
-Секако дека се загрозуваше одреден број на населението, врз основа на определбата со пописот да не се опфати една група од населението која е сигнификантна за Македонија.
Станува збор за 150 до 200 илјади Албанци кои според статистиката живеат тука. Во Македонија имаат место на живеење, но привремено работат во странство. И замислете оваа бројка да не се прифатеше да биде дел од вкупното население – колкава би била бројката на албанската етничка заедница на државно ниво, образложи Беџети.
Беџети рече дека било невозможно овие тенденции да се контролираат од Албанците, бидејќи ниту еден претставник-Албанец немал пристап до електронскиот систем за обработка на податоците.