Новата сезона во шпанската Примера и во германската Бундеслига стартуваше синоќа, денеска се подигнува фудбалската завеса и во италијанската Серија А со дуелите Јувентус – Калјари и Верона – Наполи. Најважната споредна работа во светот во три од петте најсилни национални првенства на стариот континент, сепак, падна во сенка на терористичкиот напад во Барселона во кој 13 лица загинаа, а преку 50 се повредени кога напаѓач влета во маса луѓе со комби на популарната туристичка улица „Лас Рамблас“.
Каталонија, Шпанија и Европа се шокирани од кукавичкиот настан што силно одекна во јавноста. Од сите страни стигнуваат пораки со сочувство и поддршка до семејствата на жртвите и настраданите, до шпанските централни и локални власти, за неопходноста за истрајност во борбата со тероризмот како глобална закана.
Голем број од нив се потпишани од славни спортски личности, а веста за трагедијата делуваше обединувачки и за најголемите ривали. Социјалните мрежи се преплавени со пораки во кои се изразува шок и револт од настанот, но и потреба од непоколеблива одлучност за цврсто застанување на патот на злото што може да демне насекаде.
По повод немилите сцени на „Лас Рамблас“, меѓудругите спортисти и спортски клубови, се огласија кошаркарот Пау Гасол, тенисерот Рафаел Надал, возачот во Формула 1, Фернандо Алонсо, фудбалерите Нејмар, Етик Абидал, Гари Линекер, Роналдињо, итн.
Нападот во Барселона го стави во втор план големото ривалство меѓу Мадрид и Каталонија. Со соопштение се јави и Реал Мадрид кој на својата официјална интернет страница изрази длабоко жалење за настанот, а клубот притоа додаде дека стои до жртвите и нивните најблиски.
Пораки со сочувство, покрај фудбалерите на Барселлона, испратија и нивните колеги од „кралскиот“ клуб од „Сантијаго Бернабеу“. Весникот „Марка“ што по традиција важи за близок до европскиот шампион од Мадрид испечати насловна страница со црна лента и голем натпис „Денеска не можеме да зборуваме за спорт“.
„Вестите што доаѓаат од Барселона се застрашувачки. Сета поддршка и солидарност семејствата и пријателите на жртвите во нападот“, напиша Португалецот Кристијано Роналдо додека пораки со слична содржина објавија и Герет Бејл и Серхио Рамос.