Манипулациите на власта со статистичките податоци се огромни. И после објавување на податоците од Државниот завод за статистика, Министерството за финансии продолжува да ја лаже јавноста, посочи денеска Кире Наумов од СДСМ, надополнувајќи дека е срамно што премиерот Груевски лично искажал лажни податоци.
– Прво, Министерството за финансии цела година манипулира дека Бруто домашниот производ за 2013 ќе изнесува 8 милијарди и 31 милион евра. Во одбрана на оваа нереална бројка се вклучи и независниот гувернер Богов. Но, пред четири дена Државниот завод за статистика ги демантираше. Бруто домашниот производ за 2013 година според Статистика номинално изнесува само 7 милијарди и 710 милиони евра.
– Второ, Министерството за финансии и понатаму ја фалсификува бројката за Бруто домашниот производ. Министерството продолжува да продуцира податоци кои се лажни а споредува и други податоци со неточната вредност на БДП. Така, буџетскиот дефицит за 2013 година не е 3,9% од БДП како што велат Груевски и Ставревски. Имајќи го во предвид промашувањето од 321 милиони евра буџетскиот дефицит изнесува скоро 4,1% од БДП, изјави Наумов.
Од партиската говорница тој исто така надополни дека Груевски и Ставревски преку веб страницата на Министерството за финансии „лажат дека долгот на централната влада за 2013 изнесува 34,3%“.
– Тој изнесува 2,75 милијарди евра, но тоа се 35,8% од БДП, рече Наумов од СДСМ, потенцирајќи дека со јануарското задолжување, долгот на централната Влада достигнал 36% од БДП.
Според него, премиерот Груевски лаже дека Македонија е четврто најмалку задолжена земја во Европа, и упати барање да одговори по која економска логика соопштува резултати за наводен енормен раст на градежништвото во 2013, а во истата година има рекорден пад на бруто-инвестициите од цели 12%.