Јас сум претседател на Собранието и со Деловник е пропишана мојата надлежност. Треба да створам предуслови и услови за работа, одговори Талат Џафери, претседател на Собранието на прашања на новинарите во врска со реакциите и барањата на опозицијата тој да се извини за мобингот врз собраниските служби и да поднесе оставка.
– Не сметам дека сум прекршил нешто, останатото е мислење на јавноста. Јавноста си го кажа своето. Не чувствувам потреба дека треба да се извинам, рече Џафери.
Тој објасни дека службите направиле грешка со материјалот за 71. седница и ако тој не забележал, тоа ќе значело враќање на седницата од почеток.
На новинарско прашање дали им се извинил на службениците поради навредливите зборови упатени кон нив, Џафери одговори дека на ова прашање одговор треба да дадат службениците.
– Ако некој мисли дека службата треба на улица Македонија да ја помине службата, претпоставувам дека граѓаните не сакаат таква служба. А ние како раководство на Собранието сме ги направиле сите предуслови да створиме соодветни услови за службата. Службеник во Собранието има за 20 отсто поголема плата од сите свои колеги во други институции, додаде Џафери.