Александар Трајковски е едно од лицата кое учествуваше во анкетата на НОВА, каде што се претстави „само“ како христијанин, тврдејќи дека и него и граѓаните што учествуваа на денешниот протест не ги интересираат партии. Сепак, Трајковски е функционер на ВМРО-ДПМНЕ и работи во Општина Гази Баба.
Од наводите на неговиот личен профил на Фејсбук може да се забележи и дека има или барем дека имал стаж и функција и во Унијата на млади сили на ВМРО-ДПМНЕ. Реклама за УМС е главна фотографија на неговиот профил, а во еден од неговите статуси тој му го честита изборот на Диме Спасов за министер за труд и социјална политика, нарекувајќи го „нашиот Претседател Диме Спасов“. Спасов, инаку, во февруари 2011 година беше избран за претседател на УМС на ВМРО-ДПМНЕ.
Трајковски на својот Фејсбук профил објавува и десетици фото албуми што содржат бројни фотографии со партиска ВМРО-вска иконографија, фотографии на кои покрај неговиот работен стол е закачено знаме на УМС на ОК ВМРО-ДПМНЕ за Гази Баба и негови заеднички фотографии со премиерот Никола Груевски
Еве што вели Трајковски, меѓу другото, во денешната анкета пред просториите на Општина Центар:
– … Ние како христијани, ништо друго туку само како христијани, дојдовме тука пред Општината Центар да го изразиме нашето незадоволство по однос на тоа што сака Општината да го спроведе. (…) Нас партиите не нѐ интересираат. Ние сме од нашето здружение. Ние и вчера излеговме и денеска излеговме, ќе излеземе и повторно кога ќе сметаме… Ние не сме правници, меѓутоа според нас сме тука… согласно најавите во јавноста, ќе дојде до тоа црквата да се стопира, а како што забегува Жерновски можеби ќе сака и да ја руши – вели Трајковски во анкетата за НОВА.