Двајца македонски граѓани минатиот месец заболеле од маларија. Тие биле на службени патувања во Гана и Сиера Леоне, а веднаш по доаѓањето во земјата се разболеле. И двајцата воопшто не земале терапија пред да патуваат во овие далечни земји.
Инфектолозите велат дека тие успеале да се излекуваат. Но, загрижува фактот што мината година петмина граѓани се заразиле со маларија во странство, а последните неколку години се зголемил бројот на луѓе кои заболеле од маларија во некоја од стоте ризични земји тврдат во Комисијата за заразни болести.
-Апелираме до граѓаните кои патуваат во некоја од овие држави, особено во Афричките земји задолжително да се јават во Центарот за јaвно здравје за да земаат терапија пред патување, а кога ќе се вратат да бидат под надзор на лекар неколку дена изјави доктор Јованка Костовскa од секторот за превентивна заштита во Министерството за здравство.
Особено ова важи за организаторите на патувањата кои често не обрнуваат внимание на овие работи потенцираат од таму.
Освен од маларија, граѓаните треба да се заштитат и кога патуваат во земјите каде што владее жолта треска, чума, хеморагична треска, колера. Опасност од жолта треска постои во 32 земји меѓу нив и Авагнистан и Ирак каде што наши граѓани одат да работат таму. Тие мора пред патување да примаат вакција која е на нивен трошок, а цената е различна во зависност за која болест се работи.
-За жолта треска терапијата чини околу 2000 денари, а антималариците се движат од 2000 до 5000 денари во зависност од тоа колку време треба да се примаат. Но, доколку заболат кога ќе се вратат лекувањето е на товар на државата изјави Лилјана Лазаревска од Центарот за јавно здравје.
На Клиниката за инфективни болести велат дека се подготвени со капацитет и кадар, но и со лабораториски тестови за навреме да ги детектираат овие опасни болести. Од таму велат дека досега не е детектиран ниту еден случај на западно нилска треска која како и маларијата се пренесува преку комарци, од која лани заболеа неколку граѓани кога се вратија од летување во Грција. Како ризичен период лекарите ги посочуваат летните месеци и септември кога обично се регистрираат првите случаи.
Од опасниот корона вирус кој го има во Саудиска Арабија досега починале 42 лица. Дел од нив престојувале таму, по што болеста ја донеле во Европа. Во Комисијата велат дека превземаат мерки на заштита со оглед дека за два месеца наши граѓани заминуваат на аџилак таму.