Мотивот зошто новинарот, Томислав Кежаровски го објавил идентитетот на заштитениот сведок во случајот Ореше во неговото списание „Репортер 92“ во 2008 година сé уште не се познати, објавува Макфакс.
А не е познато и засега нема докази дека новинарот зел поткуп за да го открие идентитетот.
На новинарот му се става на товар дека незаконски го објавил името на заштитениот сведок за убиството во Ореше за коешто судот на 29-ти март годинава поради немање докази ги ослободи браќата Ордан и Лупчо Ѓоргиевски, како и Ѓоре Петровски, од обвинението за платено убиството на 74-годишниот Лазар Милошевски од велешкото село Ореше.
Кежаровски уапсен поради текст во 2008-ма
Новинарот Кежаровски по сообраќајката во која загина сопственикот и новинарот во Фокус, Никола Младенов во весникот Нова Македонија, каде што сега работи, објави материјал за коj тврди дека се докази, поточно ливчиња од патарини за којшто се претпоставува дека биле на Младенов, а биле оставени на местото каде што се случи трагедијата, по увидот на истражните органи.
Уапсени обвинител, судија, адвокати, новинар
Во големата полициска акција „Ликвидација“, уапсени се вкупно осум лица, сопственикот на ресторанот „Романтик“ во Велес кој работел и како адвокат, судија во Основен суд Велес и кој е и Претседател на кривичен совет, поранешен судија, лице познато од скопското подземје, поранешен истражен судија при Основен Суд Велес, Јавен Обвинител во ОЈО Велес, новинарот и посредник.
Судијата во Основниот суд во Велес и претседател на кривичниот совет во 2008 година преку посредник побарал паричен износ од две илјади евра за да им ја укине мерката притвор на двајца осомничени за разбојништво иако не биле исполнети условите за тоа.
Истражниот судија и јавниот обвинител во друг случај посредувале кај друг јавен обвинител кој го водел предметот за недозволено изработување на оружје, за да издејствуваат кај притвореното лице да не му биде продолжена мерката притвор, а обвинителот посредувал и кај судијата.
Тој го осудил лицето условно и му ја укинал мерката притвор. Уапсените се товарат за „злоупотреба на службената положба и овластување“, „примање поткуп“, „противзаконито посредување“, „поттикнување“, „помагање“ и „соизвршителство“и „неовластено оддавање информации и податоци за сведоците, соработниците на правдата, жртвите кои се јавуваат во својство на сведоци и нивните блиски лица“ од Законот за заштита на сведоци.