По вчерашните предвремени парламентарни избори, кои завршија со тесна победа на најголемата левичарска партија, ЧССД, можни се повеќе комбинации за изгледот на идниот состав на Владата, јави дописникот на МИА од Прага.
Иако, шансите за добивање премиерски мандат се малку поголеми кај левицата, сепак, ќе биде потребно освен Социјалдемократите, кои освоија над 20,45 отсто (50 мандати) од гласовите, во Владата да учествуваат уште два коалициски партнери.
Синоќа, веќе разговараа врвовите на ЧССД и комунистите (КСЧМ-33 пратеници, 14,91 отсто) и договорија принцип на пропорционална застапеност во собраниските тела. Бидејќи заедно го немаат потребното мнозинство од 101 од 200-те пратеници потребен им е уште еден коалиционен партнер.
-ЧССД е подготвена за преговори со сите парламентарни партии, изјави лидерот Бохуслав Соботка, додавајќи дека со централно-десничарските ОДС и ТОП 09 нема да составува Влада.
Реално една од варијантите е Влада на ЧССД, АНО- 2011, КДУ-ЧСЛ (Христијанска и Демократска унија – Чехословачка народна партија) кои заедно би имале 111 пратенички гласови.
Лидерот на АНО, која доби поддршка од 18,65 отсто (47 мандати), милијардерот Андреј Бабиш веднаш по објавувањето на изборните резултати изјави дека партијата ќе остане во опозиција и нема да поддржува ниедна Влада, но подоцна не ја отфрли можноста дека ќе учествува во постизборните преговори.
Друга коалиција би можеле да состават Социјалдемократите и Демохристијаните (КДУ-ЧСЛ-14 мандати) заедно со комунистите (КСЧМ) кои добија поддршка од 14,91 отсто, односно 33 мандати, со учество на уште еден партнер. Оваа варијанта, во голема мера е неостварлива заради предизборните најави на КДУ-ЧСЛ која отфрли било какво учество во Влада заедно со комунистите.
Останатите можни комбинации, според мнозинството во Парламентот би биле возможни со коалиции од четири партии. Десницата би можела да обезбеди 103 гласа составувајќи коалиција од АНО, ТОП 09 (26 мандати), ОДС (16 пратеници) и КДУ-ЧСЛ. Ова, може да биде неостварливо поради најавата на шефот на партијата, Карел Шварценберг, кој отфрли секаква владина соработка.
„Кога ќе ги погледнам резултатите, го исклучувам нашето присуство во Владата. Мајка ми секогаш ми велеше: „Избегнувај лошо друштво“, напиша Шварценберг на Фејсбук.
Во речиси сите комбинации, со 14 пратенички мандати може да се вклучи и партијата Усвит (Зора) на сенаторот Томио Окамура.
Голем пораз кај електоратот доживеа Партијата за правата на граѓаните – Земановци чиј почесен лидер е актуелниот претседател на државата Милош Земан, освојувајќи 1,51 отсто од гласовите на граѓаните.
Уште полошо, со освоени 0,42 отсто помина избирачкиот блок „Главата горе“ која беше поддржана од претходникот на Земан, Вацлав Клаус