Под мотото „Нема ценкање со женските права“, активистите од повеќе граѓански здруженија по трет пат излегоа на протест пред Собранието на РМ за уште еднаш да побараат повлекување на Предлог законот за прекинување на бременоста.
Иако дел од нивните забелешките беа прифатени и тргнати од текстот на законот, како што е задолжителното присуство на брачниот другар, сеуште остануваат проблематичните одредби со кои се ограничува слободниот избор на жената која ја донела тешката одлука за абортус, посочуваат од граѓанските здруженија.
Задолжителното советување за предностите од продолжување на бременоста, бирократизирањето на целата постапка и давањето поголеми ингеренции на министерот кој сега треба да ја формира второстепената комисија се само дел од забелешките на невладините организации кои бараат целосно преработување на законот, а не како што велат само „козметички“ интервенции.
Тие уште еднаш укажаа на потребата од носење нов закон за прекин на бременоста, но бараат тој да биде подобар од сегашниот кој е донесен уште во 70-тите години на минатиот век, но не и да се донесе закон кој наместо да ги унапреди, ќе ги ограничи правата на жената.