Документот од Албанија кој неодамна го доби Вилма Русковска, шефицата на Обвинителството за организиран криминал и корупција, а во врска со бегството на екс премиерот Никола Груевски, не открива ништо ново, вели обвинителката Русковска за „Фокус“.
-Го разгледав документот, но нема ниту една корисна, нова информација. Пишува на кој граничен премин Груевски излегол од Албанија и каде влегол во Црна Гора, а тоа веќе го добивме како информација од Црна Гора. Албанија не го открива она што ние го баравме, а тоа е како влегол во нивната држава. Исто така нема информации, ниту снимки, за хотелот во Албанија каде што бил Груевски, изјави Русковска за „Фокус“.
Албанија претходно ги извести македонските власти дека не може да ги достави и снимките од граничните премини, бидејќи се избришани.
Снимки од граничните премини предаде Црна Гора, а се разгледуваа и снимки од камерите на македонските гранични премини, како и од камерите низ Скопје.
За бегството на Груевски во Будимпешта, Унгарија, во обвинителството исказ досега дадоа телохранителите на екс премиерот и други сведоци.
Минатата недела, министерот за внатрешни работи Оливер Спасовски изјави дека документите за распишување на потерница по Груевски за терористичко загрозување на уставниот поредок за настаните од 27 април се доставени до Интерпол и дека властите очекуваат потерницата да биде објавена.
Претходно, обвинителката Рускоска минатата недела изјави дека Интерпол одбива да распише потерница за Груевски и за разузнавачот Никола Бошкоски, обајцата осомничени како организатори на крвавите настани од 27 април.
Но, познавачи на оваа област за НОВА објаснија дека со промената на правилата на Интерпол од 2015 година, оваа меѓународна организација ги либерализира правилата за тоа во кои случаи важи црвената потерница, а едно од нив е дека доколку лицето има добиено азил, ваква потерница не може да биде распишана.