Москва: Руската новинарка Дарја Шипачева (35) е осудена на 12 години затвор во казнено-поправна колонија и парична казна од околу 3.500 евра поради велепредавство, јави порталот „Медиазона“.
Како што објави рускиот портал, пресудата ја изрекол судијата на Московскиот градски суд, Сергеј Подопригоров.
Обвинителството за Шипачева побарала токму толкава казна, а одбраната побарала од судот да го земе предвид нејзиното признавање на вината и соработката за време на истрагата. Судењето траело само час и половина.
Не е познато за што точно е обвинета новинарката, бидејќи постапката се водела зад затворени врати. Судијата наложил и одземање на 1.558.000 рубљи (околу 17.000 евра) од Шипачева, што е вообичаена практика во кривичните предмети кои се однесуваат на финансирање криминални активности.
Нејзина пријателка во разговор за „Медиазона“ споменала една парична трансакција, но рекла дека не знае „дали тоа било уплата за армијата на Украина“.
Шипачева беше уапсена на 23 април 2025 година во нејзиниот стан во Москва.
„Таа ноќ ми напиша дека некој се обидува да ѝ ја обие вратата“, раскажа нејзината пријателка за „Медиазона“.
Пријателите од соседите дознале дека во станот на Шипачева упаднала група припадници на руската специјална полиција, по што се изгубил секој контакт со неа.
Според зборовите на пријателката, Шипачева потоа била префрлена во Ростов на Дон, каде што судот ѝ одредил притвор. Соговорничката на „Медиазона“ наведува дека новинарката, откако против неа било покренато обвинение, склучила спогодба со обвинителството. Во писмата што ги испраќала од притворот не изнесувала детали за случајот.
Дарја Шипачева се занимавала со научно и медицинско новинарство. Соработувала со бројни руски и други медиуми, меѓу кои се РБЦ, „Лента“, „Форбс“.