Правдата не може да биде целосно задоволена без да се продолжи рокот за работа на Специјалното обвинителство и да се преслушаат сите снимки од бомбите кои се предадени во оваа институција, велат аналитичарите.
Анализата е достапна на албански јазик на следниот линк.
Како ќе се задоволи правдата доколку СЈО не ги преслуша и обработи сите нелегално прислушувани разговори кои кај нив ги предаде опозицијата? Кој и како ќе постапува со „бомбите“ кои не се преслушани?
Ова се само дел од дилемите кои ги наметнува во јавноста барањето на оваа институција за продолжување на рокот од 18 месеци за завршување на истражните постапки и поднесување на обвиненија.
Обвинителката Катица Јанева неодамна изјави дека досега се преслушани само 12 % од преслушаните разговори кои биле доставени до нив. Правдата не може да биде целосно задоволена без да се продолжи рокот за работа на Специјалното обвинителство и да се преслушаат сите снимки од бомбите кои се предадени во оваа институција, велат аналитичарите.
Поранешниот јавен обвинител, Јован Трпеновски за НОВА вели дека случувањата деновиве покажуваат дека најверојатно за рокот за продлжување на СЈО ќе се одлучува после изборите кои се закажани за 11-ти декември.
„Новиот парламентарен состав ќе расправа за продолжување на рокот. Доколку дојде до измена на односите на силите во парламентот, мислам дека Собранието ќе биде сосема поинакво и ќе одлучи за продолжување на рокот“, смета Трпеновски.
Тој вели дека доколку дојде до укинување на СЈО, нормално е дека се поставува прашањето околу архивата.
„Ќе треба да се применат законите за државните институции , според кои потоа треба да ги дадат на институцијата која постапува по слична проблематика. Но, во овој случај би требало да ги преземе Основното јавно обвинителство. Тоа е правната процедура, но овде имаме и практичен аспект. До укинување на СЈО не може да дојде, затоа што од практичен аспект не очекувам дека СЈО ќе престане да постои. Тие се плод на политичката криза која е се уште присутна и резултат на партискиот договор меѓу четирите партии но под гаранција на европската заедница. Ќе мора да се почитува и мислењето на европската заедница“, вели Трпеновски.
Поранешната судијка во Европскиот суд за човекови права во Стразбур, Маргарита Цаца Николовска вели дека рокот за работа на СЈО треба да се продолжи за да можат да ја сработат работата за која се основани.
„Партиите во таа насока треба да овозможат СЈО да работи, да не го прават она што постојано го прават, одредени политички гарнитури и да оневозможуваат да работи СЈО. Очигледно кога се склучувал договорот немало желба таа институција да работи како што треба“, вели Николовска.
Според професорот од Правниот факултет и еден од советниците на тимот на Јанева, Димитар Апасиев, во пресрет на гласините за укинување на СЈО од страна на Уставниот суд, најдобро би било овој суд да го укине само членот 22 од Законот за СЈО. Во интервју за порталот Фактор, вели дека овој контроверзен член, предвидува прекраток рок за поднесување обвинение против политичарите за делата кои произлегуваат од прислушкуваните материјали и ги привилегира носителите на јавни функции кои се директно засегнати од тековни или идни постапки за криминал, бидејќи ваков рок не постои во Законот за кривична постапка.
„Колку за споредба, рокот за застарување на кривичното гонење во Кривичниот законик за нас „обичните смртници“ е десет до петнаесет години, додека за корумпираните политичари е предвидено тој да изнесува само година и пол (!?) – рок во кој е невозможно да се спроведат сложени финансиски истраги. Згора на сè, ако се земе предвид фактот дека СЈО во својот почетен период на работа имаше реални проблеми при своето конституирање, кадровско и просторно екипирање и соработка со другите државни органи, како и фактот дека скоро два месеца неговата работа практично беше блокирана поради противправната „аболиција“ дадена од страна на Претседателот на РМ – станува јасно дека овој фиксно утврден временски период е објективно прекраток за спроведување на темелни истраги“, вели Апасиев за Фактор.
Според него, оправдано се поставува прашањето: „дали со ваквата несмасна и избрзана формулација, законодавецот – раководен од тендерската коалиција на ДПМНЕ и ДУИ – сакал да ја попречи правдата во лична корист на осомничените високи партиски функционери, кои ја злоупотребиле својата позиција за лично богатење на штета на јавниот интерес, за тие никогаш да не бидат изведени пред независен и непристрасен суд и да одговараат за сторените тешки кривични дела кои им се ставаат на товар!?“
Според портпаролот на партијата, Иво Котевски, СЈО имале доволно време да ги преслушаат сите разговори. „Пред да биде формирано СЈО, имаше некои предмети во ОЈО кое му ги предаде на СЈО. И Катица Јанева ако паметите рече дека нема потреба од дополнителен број на обвинители, тие избркаа две обвинителки. Непринципиелно е да се претпоставува, но постои рок за нивната работа“, вели Котевски за НОВА.
Лидерот на ВМРО-ДПМНЕ, Никола Груевски неодамна кажа дека тие нема да ги поддржат барањата на Јанева за продолжување на нивниот рок за работа, измените на Законите за заштита на сведоци и препораките на Венецијанската комисија за измени на законите за приватноста и свиркачите.